Uncategorized

ፍርድ ቤቱ መርማሪ ፖሊስ በዓለም ገነት ቆርቆሮ ፋብሪካ ባለቤት አቶ ዓለም ፍፁም ላይ ምርመራ አጠናቆ እንዲቀርብ የ10 ቀን የምርመራ ጊዜ ፈቀደ

አዲስ አበባ፣ ህዳር 12፣ 2011 (ኤፍ.ቢ.ሲ) የዓለም ገነት ቆርቆሮ ፋብሪካና በግንባታ ላይ ያለው ፎር ፖይንት ሸራተን ሆቴል ባለቤት አቶ ዓለም ፍፁም  ዛሬ ፍርድ ቤት ቀረቡ።

በፌደራል ከፍተኛ ፍርድ ቤት ልደታ ምድብ 10ኛ የወንጀል ችሎት የቀረቡት አቶ አለም ፍጹም ሪቬራ ሆቴልና የፕላስቲክ ፋብሪካን ከብረታ ብረትና ኢንጂነሪንግ ኮርፖሬሽን የቀድሞ ዋና ዳይሬክተር ሜጄር ጀኔራል ክንፈ ዳኘው ጋር ባለ የቅርብ ዝምድናና ጓደኝነት በተጋነነ ዋጋ በመሸጥ ወንጀል ተጠርጥረው ነው።

የብረታ ብረትና ኢንጂነሪንግ ኮርፖሬሽን ቦርድ ሆቴሉ እንዳይገዛ ወስኖ ሳለ 128 ሚሊዮን ብር ተስማምተው ውሉ ላይ ግን በ195 ሚሊዮን ብር ሸጠዋል 67 ሚሊዮን ብር ልዩነቱንም ከኢትዮጵያ ልማት ባንክ የወሰዱትን ብድር ከፍለውበታል ብላል መርማሪ ፖሊስ ለችሎቱ።

ሽያጩ ሲፈጸም የሽያጭ ግብር ለጉሙሩክ በሻጭ መከፈል ቢኖርበትም ገዢው ሜቴክ 15 ሚሊዮን ብር እንዲከፍል ተብሎም ውሉ ላይ መፈረሙንም ነው ያስረዳው።

በመሆኑም ግለሰቡ ሽያጩ ያልተገባና ዝምድና ላይ የተመሰረተ በተጋነነ ዋጋ በመፈፀም የህዝብን ገንዘብ ተጠቅመዋል በሚል በከባድ የሙስና ወንጀል ተጠርጥረዋል።

ፖሊስ ወንጀሉ ውስብስብ በመሆኑና የሰው ምስክር ለማቅረብ፣ የቦታዎቹን ዋጋ በባለሙያ ለማስገመትና ኦዲት ለማስደረግ የ14 ቀን የምርመራ ጊዜ ይፈቀድልኝ ሲል ፍርድ ቤቱን ጠይቋል።

አቶ ዓለም በጠበቆቻቸው በኩል አብዛኛው ስራ የሰነድ በመሆኑና በዝርዝር ስለቀረበ ተጨማሪ ጊዜ አያስፈልግም፤ አቶ ዓለም በስራቸው 520 ሰራተኞች ስለሚያስተዳድሩ አገርም ይጎዳል በዋስ ይውጡ፤ እንደተባለውም ከሜጄር ጀኔራል ክንፈ ዳኘው ጋር ዝምድናም ትውውቅም የላቸውም ስለዚህ የምርምር ጊዜው አይፈቀድ ብለው ጠይቀዋል።

ፖሊስ በዋስ ቢወጡ ማስረጃ ያጠፉብኛል፤ ምስክሮች እንዳይመሰክሩ ያደርጋሉ፤ ዝምድናን በተመለከተም በማስረጃ አረጋግጣለሁ ብሏል ለችሎቱ።

ግራ ቀኙን ያዳመጠው ፍርድ ቤቱ 10 ቀን ተጨማሪ የምርመራ ጊዜ ፈቅዷል፥  በዚሁ መሰረት የቀጠሮው ቀን ህዳር 22 ቅዳሜ ላይ የሚውል በመሆኑ ለህዳር 24 ቀን 2011 ዓመተ ምህረት ቀጠሮ ሰጥቷል።

 

 

በባሃሩ ይድነቃቸው

 

 

 

Source: fana bc

abu hanya
Founder of Al Nejash Media is a journalist(MA), with more than 9 years of professional career
http://www.alnejashmedia.com

Leave a Reply

Your email address will not be published. Required fields are marked *